Апоўдні настаяцель
храма протаіерэй Віталь Кісель здзейсніў малебен на сажалцы каля цэнтральнай
раённай бальніцы, правёў асвячэнне вады і шчыра павіншаваў вернікаў са святам
Вадохрышча.
Пажадаўшы ўсім
здароўя цялеснага і духоўнага, святар запрасіў усіх, хто не баіцца
вадохрышчанскай палонкі, здзейсніць абмыванне.
Першым рашуча
ступіў у іардань Васіль Багдановіч. Варта адзначыць, Васіль Іванавіч некалькі
дзесяцігоддзяў рэгулярна прымае ўдзел у вадохрышчанскіх купаннях. Сёлета
жадаючых акунуцца ў палонку за ачышчэннем душы і ўмацаваннем веры было нямала.
Не адважыўшыяся выкупацца землякі працягвалі рукі да асвячонай вады і проста
абмывалі твар.
Выходзячы з ледзяной вады з адухоўленымі тварамі, бешанкаўчане радасна
дзяліліся ўзрушаючымі ўражаннямі. Некаторыя адкрыта прызнаваліся, што
здзяйснялі акунанне ўпершыню і цвёрда вырашылі, што цяпер будуць рабіць гэта
кожны год, як Аляксей Варанько, Анатоль Куташоў, Анатоль Вавула, Святлана
Дзядкова, Наталля Новікава…
«Аб купанні ў палонку на Богаяўленне я задумалася даўно, але, як медыцынскі
работнік, разумела што без падрыхтоўкі нельга! Я стала вывучаць і практыкаваць
тэму загартоўвання, каб не нашкодзіць арганізму, а ўмацаваць сваё здароўе,
павысіць імунітэт, павялічыць працягласць жыцця, а таксама праверыць сілу
свайго духу. Гэта было маё першае купанне. Адчуваю прыліў сіл бадзёрасці,
энергіі, — дзеліцца тым, што адчула, Наталля Новікава. - Дзякую ўсім, хто мае
дачыненне да арганізацыі месца купання, усё — на вышэйшым узроўні: высланая
яловымі лапкамі дарожка да палонкі, ёсць пункт абагравання, зручны спуск да
палонкі (лесвічка і драўляныя падмосткі)...»
Растершись ручніком, людзі яшчэ некалькі хвілін стаялі на беразе, атрымліваючы
асалоду ад неверагоднага адчування лёгкасці. «Як пасля апарні ў снег, -
адзначыў Анатоль. - Спачатку холадна, потым стала добра, нават горача. Выдатныя
адчуванні...»
«Цудоўна!»- дадае Васіль Іванавіч.
...Пакуль аматары прыроднай ванны саграваліся гарачай гарбатай, за іх бяспекай
пільна сачылі супрацоўнікі РАУС, АСВОД.
Дзяжурыла хуткая медыцынская дапамога. На баявым пасту, нягледзячы на
прафесійнае свята, быў і пажарны-ратавальнік сяржант унутранай службы Пётр
Полудзеткiн.
«Уваходзьце ў воды іарданскiя, памятаючы, яны асвечаныя Госпадам Богам.
Уваходзьце ў купель з глыбокай павагай і малітвай, прымайце святую ваду, яна
будзе на карысць...» - даў наказ землякам Віталь Кісель.
Вадохрышчанскае купанне працягнецца да самага вечара…
"Зара"
