З рабочым візітам у канцы сакавіка Бешанковічы
наведаў дзяржаўны будаўнічы інспектар інспекцыі Дзяржбуднагляду па Віцебскай
вобласці Аляксей Літвінчук. Аляксей Аляксеевіч праверыў падкантрольныя
аб'екты будаўніцтва, якасць і адпаведнасць работ зацверджанай праектнай
дакументацыі.
Бо гэтымі пытаннямі ў сферы будаўніцтва як раз і займаюцца органы дзяржаўнага
будаўнічага нагляду. Калі казаць больш прадметна, галоўнай іх задачай
з'яўляецца нагляд за выкананнем удзельнікамі будаўнічай дзейнасці ўстаноўленага парадку
будаўніцтва, патрабаванняў тэхнічных нарматыўных прававых актаў і праектнай
дакументацыі.
У райцэнтры на гэты момант тры такія аб'екты - узвядзенне 40-кватэрнага жылога
дома на вуліцы Урыцкага і капітальныя рамонты дамоў на вуліцах Чарняхоўскага і
Карла Маркса, падрадчыкамі якіх выступаюць адпаведна ПМК‑41 і камунальная
служба.
Ад строгага погляду не схаваецца ні адно парушэнне. Аднак, ацаніўшы якасць
работ, інспектар Дзяржбуднагляду не выказаў сур'ёзных заўваг вытворцам. Але
нагадаў аб неабходнасці заўсёды клапаціцца пра ўтрыманне будпляцоўкі ў належным
стане, каб не было гор будаўнічага смецця, тэрыторыя мела эстэтычны выгляд,
матэрыялы і абсталяванне складаваліся ў спецыяльна адведзеных для гэтых мэт
месцах, а агароджа, якая прадухіляе доступ старонніх асоб на тэрыторыю аб'екта,
была ўстаноўлена належным чынам, выконваліся правілы аховы працы.
Пазней у райвыканкаме для ўсіх зацікаўленых адбыўся "круглы стол".
Удзел у ім прынялі намеснік старшыні райвыканкама Віктар Грышан, дырэктар УКП
ЖКГ "Бешанковіцкі Камунальнік" Ігар Слівец, дырэктар ГП
"Бешанковіцкая ПМК-41" Сяргей Пашалюк, а таксама дырэктар ДП
"Упраўленне капітальнага будаўніцтва Ушацкага раёна" Аляксандр Лосеў.
У цэнтры ўвагі былі бягучыя пытанні і задачы на
перспектыву. Нягледзячы на адсутнасць сур'ёзных заўваг, Аляксей Аляксеевіч
падкрэсліў, што расслабляцца не варта, бо пільнасць на будпляцоўках, як і
захаванне ўсіх тэхналагічных працэсаў — гарант не толькі якасці, але і бяспекі.
"Для будаўніцтва пытанне якасці з'яўляецца адным з прыярытэтных, паколькі
гэта галіна ўваходзіць у лік самых складаных, інавацыйных і дынамічна
развіваючыхся, — падкрэсліў Аляксей Аляксеевіч. — 2024-ы
праходзіць пад знакам Года якасці. Але хачу адзначыць, што яна ў будаўніцтве
павінна быць пастаяннай, а не толькі ў гэтым годзе. Варта памятаць: тое, што мы
будуем, — гэта для людзей. Адсутнасць якасці багата пагрозай бяспекі і
нанясеннем эканамічнага ўрону. Таму і ў далейшым мы працягнем надаваць дадзенай
тэме першачарговую ўвагу.
Нягледзячы на шырокія паўнамоцтвы, галоўная наша задача — не пакараць, а
падказаць. Бо для паспяховай рэалізацыі праекта кожнаму ўдзельніку будаўнічай
дзейнасці трэба добра папрацаваць. Толькі сумеснымі намаганнямі заказчыкаў і
падрадчыкаў, праекціроўшчыкаў, інжынерных арганізацый, якія ажыццяўляюць
тэхнагляд, можна забяспечыць эксплуатацыйную надзейнасць і годную якасць
узводзiмых аб'ектаў».
